కేంద్రమంత్రి రవిశంకర్ ప్రసాద్‌పై థరూర్ పరువునష్టం కేసు

తనను హత్యకేసు నిందితుడని పేర్కొన్నందుకు కేంద్రమంత్రి రవిశంకర్ ప్రసాద్‌పై కాంగ్రెస్ నాయకుడు శశి థరూర్ పరువునష్టం దావా వేశారు. థరూర్ భార్య సునందా పుష్కర్ అనుమానాస్పద పరిస్థితుల్లో మరణించిన సంగతి తెలిసిందే. ఆమె ఆత్మహత్య చేసుకున్నట్టు పోలీసులు నిర్ధారణకు వచ్చారు. ఆత్మహత్యకు ప్రేరేపించడం, క్రూరంగా ప్రవర్తించడం అనే ఆరోపణలతో థరూర్‌పై విచారణ జరుగుతున్నది. ప్రదాని నరేంద్రమోదీ శివలింగంపై తేలులాంటి వాడని థరూర్ చేసిన వ్యాఖ్యలకు స్పందనగా ప్రసాద్ థరూర్‌ను హత్యకేసు నిందితుడు అని సంబోధించారు. నిజానికి ఆ వ్యాఖ్య ఓ ఆర్‌ఎస్‌ఎస్ వ్యక్తి చేసినట్టు వచ్చిన పత్రికా కథనాన్ని గుర్తుచేస్తూ మాత్రమే తాను ఆ వ్యాఖ్యలు చేశానని థరూర్ వివరణ ఇచ్చారు. దేశ న్యాయశాఖమంత్రే ఇలా లేని హత్యకేసులో తనను నిందితునిగా పేర్కొంటే ఇక న్యాయం, ప్రజాస్వామ్యానికి దిక్కేమిటని థరూర్ అదేరోజు ట్విట్టర్‌లో విమర్శలు ఎక్కుపెట్టారు. తర్వాత పరువునష్టం నోటీసు పంపారు. దీనిపై మంత్రి స్పందంచకపోవడంపై థరూర్ కోర్టును ఆశ్రయించారు.

Related Stories: