బాలికపై లైంగిక దాడి.. హత్య

కెరమెరి : కుమ్రం భీం ఆసిఫాబాద్ జిల్లా కెరమెరి మండల కేంద్రంలో ఓ బాలిక దారుణ హత్యకు గురైన ఘటన కలకలం రేపుతున్నది. మండల కేంద్రంలోని ఎస్సీ కాలనీకి చెందిన సంధ్య (15) స్థానిక జడ్పీ హైస్కూల్‌లో ఏడో తరగతి చదువుతున్నది. ఉదయం బహిర్భూమికని వెళ్లింది. ఎంతసేపటికీ తిరిగి రాకపోవడంతో ఆందోళన చెందిన తల్లి లలిత చుట్టుపక్కల వారితో కలిసి వెతికింది. చిన్నారి సాయంత్రం శవమై కనిపించింది. గ్రామస్తుల సమాచారం అందుకున్న డీఎస్పీ సత్యనారాయణ, వాంకిడి సీఐ వేణుగోపాల్, ఎస్ సత్యనారారయణ ఘటన స్థలానికి చేరుకొని విచారణ చేపట్టారు. ప్రత్యేక పోలీసు బలగాలు సైతం రంగంలోకి దిగి, డాగ్‌స్కాడ్‌తో క్షుణ్ణంగా తనిఖీ చేశారు. బాలిక మెడ, ముఖభాగంలో గాయలు కనిపించడంతో లైంగికదాడి చేసి, హత్య చేసి ఉండవచ్చని పోలీసులు అనుమానం వ్యక్తం చేస్తున్నారు. ఒక్కగానొక్క కూతురు మృతి చెందడంతో తల్లిదండ్రులు లలిత-తిరుపతి కన్నీరుమున్నీరవుతున్నారు. తల్లి ఫిర్యాదు మేరకు ఎస్‌ఐ కేసు దర్యాప్తు చేస్తున్నారు. అనుమానితుడిని పోలీసుల అదుపులోకి తీసుకొని విచారిస్తున్నట్లు తెలిసింది.

Related Stories: