లక్ష కోట్లు ఆవిరి

-సెన్సెక్స్ 500 పాయింట్లు డౌన్ - పట్టు బిగిస్తున్న బేర్స్ - ఎఫ్‌పీఐల అమ్మకాల జోరు -ర్యాలీ అయిపోయింది: గోల్డ్‌మన్ సాచ్స్
స్టాక్ మార్కెట్ మరో సారి బేర్‌మంది. గత రెండు రోజుల ఉత్సాహం నీరుగారి పోయింది. వచ్చిన లాభాలు గాలిబుడగలయ్యాయి. సెన్సెక్స్ 505.13 పాయింట్లు నష్టపోయి 37.585.51 వద్ద ముగిసింది. నిఫ్టీ 137.45 పాయింట్లు పతనం అయి 11,377.75 వద్ద ముగిసింది. నికరంగా 1.14 లక్షల కోట్ల ఇన్వెస్టర్ల సంపద ఆవిరైపోయింది. రూపాయి విలువను బలోపేతం చేయడానికి ప్రభుత్వం గత వారాంతంలో ప్రకటించిన ఉద్దీపన చర్యలు ఉసూరుమనిపించాయి. మార్కెట్ ఏమాత్రం రుచించలేదు. రూపాయి మారకం విలువ 66 పైసలు తగ్గింది. ట్రేడ్ వార్ భయాలు మార్కెట్‌ను వెన్నాడాయి. వెరసి స్టాక్‌మార్కెట్ మరోసారి బేర్స్ పట్టులోకి వెళ్లింది. ఐటీ మినహా అన్ని రంగాల ఇండెక్స్‌లూ నష్టాల్లోనే ముగిసాయి. సోమవారం రాత్రికే అమెరికా అధ్యక్షుడు డోనాల్డ్ ట్రంప్ చైనా దిగుమతులపై అదనంగా 200 బిలియన్ డాలర్ల సుంకాలను విధించనున్నారన్న వార్తలు మార్కెట్ సెంటిమెంట్‌ను బలహీన పరిచాయి. అంతర్జాతీయ మార్కెట్లు కూడా స్తబ్దుగా ట్రేడ్ అవుతుండడంతో ఇన్వెస్టర్లు భారీగా అమ్మకాలకు దిగారు.

ట్రేడ్ వార్ డర్

అమెరికా అధ్యక్షుడు చైనా దిగుమతులపై 25 శాతం వరకు సుంకాలను విధించవచ్చుననీ, వీటి విలువ 200 బిలియన్ డాలర్లుంటుందని వాల్‌స్ట్రీట్ జర్నల్ ప్రచురించింది.దీంతో ఈ నెలాఖరులో జరుగనున్న వాణిజ్య చర్చల్లో పాల్గొనబోవడం లేదంటూ చైనా కాలుదువ్వింది. దీంతో ప్రతీకార సుంకాలకు చైనా దిగవచ్చునన్న అంచనాలు వెలువడుతున్నాయి. వీటన్నింటికీ తోడు ప్రపంచ మార్కెట్లన్నింటి కన్నా అధికంగా పెరిగిన ఇండియన్ స్టాక్ మార్కెట్ పరుగు ఇక అయిపోయిందంటూ గోల్డ్‌మన్ సాచ్స్ నివేదిక ప్రచురించడంతో ఇన్వెస్టర్ సెంటిమెంట్ మీద గట్టి దెబ్బ పడింది.

అన్ని రంగాలూ నష్టాల్లోనే...

ఐటీ, చక్కెర రంగాలు మినహా దాదాపు అన్ని రంగాల షేర్లూ నష్టాల్లోనే ముగిసాయి. ఆర్థికసేవల రంగం 1.68 శాతం, ఫార్మా 1.40 శాతం, ఎఫ్‌ఎంసీజీ 1.38 శాతం, బ్యాంక్ నిఫ్టీ 1.26 శాతం చొప్పున నష్టపోయాయి. కాగా, మిడ్‌క్యాప్-100 ఇండెక్స్ 0.65 నష్టపోయింది. స్మాల్‌క్యాప్ ఇండెక్స్ మాత్రం 0.17 శాతం లాభంతో ముగిసింది.ఎన్‌ఎస్‌ఈలో 1012 షేర్లు నష్టాల్లో ముగిస్తే 805 షేర్లు లాభాల్లో ముగిసాయి. బజాజ్ ఫైనాన్స్ 2.85 శాతం, టైటాన్ 2.80 ఇన్‌ఫ్రాటెల్ 2.8 శాతంతో గరిష్ఠంగా నష్టపోయాయి. సన్ ఫార్మా 2.54 శాతం, టాటామోటార్స్ 2.53 శాతం చొప్పున నష్టపోయాయి. బీపీసీఎల్ 2.74 శాతం, హింద్‌పెట్రో 1.88 శాతం, టెక్‌మహీంద్రా 0.94 శాతం, ఐఓసీ 0.81 శాతం చొప్పున లాభపడ్డాయి. ఇకపోతే ఎఫ్‌ఐఐలు రూ.106.54 కోట్ల విలువైన షేర్లను విక్రయించగా, డీఐఐలు కూడా మరో రూ.180.36 కోట్ల అమ్మకాలను జరిపారు.

ట్రెండ్ బలహీనం

నిఫ్టీ 11400 స్థాయికి దిగువన ముగియడంతో రెండు రోజుల రికవరీ ప్రయత్నాలన్నీ విఫలమయ్యాయి. నిఫ్టీ స్వల్ప కాల మూవింగ్ యావరేజీలన్నింటి దిగువన ముగియడంద్వారా స్వల్పకాలిక ట్రెండ్ బేరిష్‌గా మారింది. గత వారం నమోదు అయిన కనీస స్థాయి 11250 ప్రస్తుతానికి నిఫ్టీకి కీలకంగా మారింది. ఈ స్థాయికి దిగువన ముగిస్తే దీర్ఘకాల ట్రెండ్ కూడా బేరిష్‌గా మారుతుంది. అలాగే నిఫ్టీకి 11520-11600 జోన్ గట్టి నిరోధకంగా మారింది. ఈ జోన్‌కు ఎగువన మాత్రమే మార్కెట్ బుల్లిష్‌గా మారుతుంది.

ఊపిరులూదని ఉద్దీపన

డాలర్‌తో రూపాయి మారకం విలువను బలోపేతం చేసేందుకు గత వారం ప్రభుత్వం ప్రకటించిన చర్యలు ఏమాత్రం ప్రభావం చూపించలేకపోయాయి. సోమవారం మరో 67 పైసలు పతనం అయి డాలర్‌కు రూ. 72.51 గా ముగిసింది. ఒకదశలో రూ.72.69 స్థాయికి కూడా పతనం అయింది. ప్రభుత్వం ప్రకటించిన చర్యలు ఏమాత్రం అంచనాలకు తగ్గట్టు లేవని ఇప్పటికే హెచ్‌డీఎఫ్‌సీ బ్యాంక్, నోమురా లాంటి సంస్థలు నివేదికలను ప్రచురించాయి. రూపాయి పతనం ప్రభావం స్టాక్‌మార్కెట్ మీద కూడా పడింది. ఒకదశలో రూ.72.69 స్థాయికి చేరుకోగానే రిజర్వ్‌బ్యాంక్ జోక్యం చేసుకుని డాలర్లను అమ్మేసింది. గతవారం రూ.73 కనీస జీవితకాల కనీస స్థాయిని తాకిన తర్వాత ఆర్థిక గణాంకాల నేపథ్యంలో వేగంగా దాదాపు రూపాయికి పైగా మేర కోలుకుంది. మరోవైపు క్రూడాయిల్ బ్యారెల్ దర 78.52 డాలర్లకు చేరుకోవడంతో కూడా రూపాయి మారకం విలువపై ప్రభావం పడింది.

పెరుగుతున్న వాణిజ్య లోటు నేపథ్యంలో మిగతా ఆసియాదేశాల కరెన్సీలతో పోల్చితే రూపాయి మారకం విలువ ఎక్కువగా పతనం అయింది. మరో వైపు 10 ఏండ్ల సావరిన్ బాండ్లపై రాబడి 8.10 శాతానికి చేరుకుంది. విదేశీ పెట్టుబడుల ఉపసంహరణ గత పక్షం రోజుల్లో ఊపందుకోవడంతో దేశం నుంచి డాలర్ పెట్టుబడులు తరలివెళుతున్నాయని స్పష్టం అవుతుంది. గత రెండు వారాల్లో రూ. 9,406 కోట్ల పెట్టుబడులను క్యాపిటల్ మార్కెట్ నుంచి ఎఫ్‌పీఐలు ఉపసంహరించుకున్నారు. మరో వై విదేశీ కరెన్సీ నిల్వలు 400 బిలియన్ డాలర్ల దిగువకు పతనం అయ్యాయి. వరుస నెగటివ్ అంశాలతో కరెన్సీ మార్కెట్ సెంటిమెంట్ బలహీన పడింది.

అంతర్జాతీయ పరిణామాల వల్లనే రుపీ పతనం: జైట్లీ

అంతర్జాతీయంగా నెలకొన్న పరిస్థితుల వల్లనే రూపాయి పతనం చెందుతున్నదని కేంద్ర ఆర్థిక మంత్రి అరుణ్ జైట్లీ స్పష్టంచేశారు. అమెరికా-చైనా దేశాల మధ్య నెలకొన్న వాణిజ్య యుద్ధం, యూఎస్ ప్రభుత్వం తీసుకున్న అంతర్గత పాలసీ నిర్ణయాలు రూపాయి పతనానికి ఆజ్యం పోశాయని ఆయన విమర్శించారు. ఇంధన సరఫరాను తగ్గించడానికి ఇరాన్ చర్యలు తీసుకుంటుండటంతో గ్లోబల్ మార్కెట్లో క్రూడాయిల్ భగ్గుమంటున్నదని, త్వరలో అన్ని సర్దుకుంటాయని ఆశిస్తున్నట్లు మంత్రి చెప్పారు.

Related Stories: