పోలీస్ కవచం

బెల్లంకొండ శ్రీనివాస్ కథానాయకుడిగా ఓ చిత్రం తెరకెక్కుతున్న విషయం తెలిసిందే. శ్రీనివాస్ మామిళ్ల దర్శకుడిగా పరిచయమవుతున్నారు. కాజల్ అగర్వాల్, మెహరీన్ కథానాయికలు. వంశధార క్రియేషన్స్ పతాకంపై నవీన్ సొంటినేని నిర్మిస్తున్న ఈ చిత్రానికి కవచం అనే పేరును ఖరారు చేశారు. శుక్రవారం ఈ చిత్రానికి సంబంధించిన ఫస్ట్‌లుక్‌ని విడుదల చేశారు. దర్శకుడు మాట్లాడుతూ బెల్లంకొండ శ్రీనివాస్ తొలిసారి పవర్‌ఫుల్ పోలీస్ ఆఫీసర్ పాత్రలో నటిస్తున్న చిత్రమిది. యాక్షన్ థ్రిల్లర్‌గా తెరకెక్కుతున్న ఈ చిత్రంలో విలన్‌గా బాలీవుడ్ నటుడు నీల్‌నితిన్ ముఖేష్ నటిస్తున్నారు. టాకీ పూర్తయింది. సరికొత్త నేపథ్యంలో ఆద్యంతం ఉత్కంఠభరితంగా రూపొందుతున్న ఈ చిత్రాన్ని అన్ని కార్యక్రమాలు పూర్తిచేసి డిసెంబర్‌లో ప్రేక్షకుల ముందుకు తీసుకురావాలని సన్నాహాలు చేస్తున్నాం అన్నారు. హర్షవర్ధన్‌రాణే, పోసాని కృష్ణమురళి, సత్యం రాజేష్ తదితరులు నటిస్తున్నారు. ఈ చిత్రానికి సంగీతం:తమన్, ఛాయాగ్రహణం: చోటా కె. నాయుడు, ఆర్ట్: చిన్నా.