మీసం మెలేయ్ చిన్నా..

మా తాత మీసాలపై నిమ్మకాయలు నిలబెట్టేవాడు అని అప్పుడెప్పుడో చెప్పుకున్నాం. ఎందుకంటే ఈ స్మార్ట్ కాలంలో యువకులంతా చాలా స్మార్ట్‌గా తయారవుతుండటంతో మీసాలు, గడ్డాలు పెంచేవారి సంఖ్య తగ్గిపోయింది. దీంతో మీసాలు, గడ్డాలు పెంచేలా యూత్‌ను ప్రోత్సహించేందుకు విచిత్రంగా పోటీలు నిర్వహిస్తున్నారు.

ఇంగ్లండ్‌లోని నార్త్ ఇంగ్లిష్ టౌన్ ఆఫ్ బ్లాక్ పూల్లో మీసాలు, గడ్డాల పోటీలు ప్రపంచ దృష్టిని ఆకర్షిస్తున్నాయి. ఈ పోటీలకు ప్రపంచం నలుమూలల నుంచి దాదాపు 200 మందికిపైగా అభ్యర్థులు వచ్చేశారు. మొత్తం 21 విభాగాల్లో జరిగే ఈ పోటీలను చూసేందుకు ఔత్సాహికులు కూడా భారీగా వచ్చేశారు. వయసు, జాతి, మతాలతో సంబంధం లేకుండా మీసాలు మెలేస్తూ, గడ్డాలు నిమురుతూ పోటీలకు సై అంటున్నారు. ఈ పోటీల్లో పాల్గొంటున్న ఒక్కొక్కరిదీ ఒక్కో కేశాలంకరణ. ఏ ఒక్కరూ కూడా ఒకేలా గడ్డాలు, మీసాలు పెంచలేదు. ఈ పోటీల్లో యువకులు తెగ సందడి చేస్తున్నారు. అయితే, ఈ పోటీల్లో పెట్టుడు మీసాలు, గడ్డాలు ఉన్నవాళ్లూ ఉన్నారు. ఫైనల్‌లో అత్యుత్తమ గడ్డం, అత్యుత్తమ మీసం, పూర్తి గడ్డం, ఫ్రీైస్టెల్ వంటి విభాగాల్లో బహుమతులు ఇస్తారు. ఈ పోటీల్లో పాల్గొన్నవారంతా తమ మీసాలను, గడ్డాలను అమితంగా ప్రేమిస్తున్నవారే. ఈ పోటీల్లో యూరోపియన్లు, ఆంగ్లేయులు, బ్రిటీషర్లు వెరైటీ కేశాలంకరణలతో అలరిస్తున్నారు. ఈ పోటీలు ప్రతి రెండేండ్లకొకసారి జరుగుతుంటాయి కాబట్టి, వీటికి మంచిపేరుంది. అయితే, ఈ పోటీల్లో పాల్గొనే వారి సంఖ్య ప్రతియేటా పెరుగుతుందని, వారిలో యువకులే అధికంగా ఉన్నారని నిర్వాహకులు చెబుతున్నారు.